مشتاق بقلم الشاعر غدير سلام

مشتاق 

.

يا حلوة شو عملتِ فيّي ؟؟؟!! 

هَون و ماني هَون .. و وسع الكَون ..

و ذات اللّون .. لَونِك بعينيّي . 

من يوم عرفتِك .. بقيت بَسمتِك .. و ضحكتِك .. 

عم يتغامزو عليّي ..

و يتغنّجو متل سَمكات .. فضيّات ..

و عم يلعبو مع بعض بالميّة .

و أنا شارد مرّات .. بكَيفي .. و مرّات .. غصب عنّي .. 

من كتر ما أخدتِ منّي .. حتّى صارو إيدَيّي ..

يشاورو ع طيفِك .. كل الوقت ..

و الوقت ساعاتو كحليّة .. 

و قلبي العم يعزفو لذات اللّحن .. بأيّا وقت لَحّنتيه ؟ 

و على مسامعي نَغّمتيه ؟ .. و طيفك يتيه ..

و بكياني يضنّ .. و يفنّ .. بأشواق خمريّة ..

و الضّنَى بحالي .. ضوعو لحتّى ينول موّالو ..

و عقلي .. ناسي كل أفكارو ..

بليلو تايه .. و ضايع بعدها بنهارو ..

ترتيلو نغمة وحيدة .. بتفنّ و ما بتروق .. 

و هيّي .. و طَيفِك يا حسرتي .. شم و أوعى تدوق .. 

بعدِك ضناني الشوق .. يا أحلى جوريّة ..

مشتاق شوفك و ضمّك .. ضمّك عَ صدري كتييير ..

و شو مشتاق تا شمّك .. و أتنفّسك عمري ..

و أسرق ورد خدّك .. و من بعدو شهد تمّك ..

و يتسامرو الأحضاااان .. و يحكو حكي العشاق ..

و يخافو غضب لفرااااق .. و تنهيدات يوميّة ..

يالله ي حلوة ناطرك .. يالله ..

بخجل إنّي  أدعيكِ ألف مرّة .. 

يالله تَ أشواقنا نسلّا .. و نحلّا .. لهاك المسألة ..

العم تقَصّر أعمارنا اللّيلكيّة  ..

لا تخلّي عتم لغياب .. يطَورق على الأبواب .. 

و عتااااب يلحق قفا لعتاب .. ساعيّة .

قلبي إلِك مَيّال .. يلّي سكنتِ القلب .. 

وِ الروح و المهجة .. و شْغلتِ الفضا ال بالبال .. 

و العرزال ..

ناطر لحتى تعودي بشي صبح ..

أو بعتمة تجي .. بألوان سحريّة ..

و خدود مرقيّة .

.

.

بحبّك 

.

آمل التوثيق لو تكرمتم متفضلين .

.