أنين قلم بقلم الشاعر محمد عزو حرفوش
.. محكيّة..
أنين قلم..
خبّرني يا قلم
شو صاير معك
زايد أنينك
شو اللي موجّعك؟
يا ما سحرت
بشفافك سطور
من زيت حروفك
يا ما سطع نور
تنسج أمل
ترسم فرح وزهور
يا ما كنت تسمعني
يا قلم واسمعك.
ما بعرفك من
قول الحقّ
بتستحي
ولا خانك بيوم
عطر الوحي
الفجر من شفافك
يا ما صحي
يعانقك فرحان
والليل يودّعك.
حاسس إنّك
من الشمس
خجلان
راح الملح
بين البشر
ضيعان
حقّك يا قلم
تكون مقهور
وعتبان
كتر الأيادي
شو عملت معك.
خبرني يا قلم
عن حكايا العشاق
عن سحر التلاقي
عن وجع الفراق
والوفا والصدق
والبخور والحبق
عن كلشي هيّج مدمعك.
غيمات بالسما
تكدّرت
ماتت عطش
هدب الزمان
تكبّر تغيير
ما رمش
حتّى القمر
بِ غربته/و
كتير اندهش
لملم حكايته/و
وخباها معك.
لا تعتزل
أرجوك يا قلم
بعدك ما في
تاريخ ينكتب
ولا حروف
للأمل تنسكب
ما في قانون
ما في قيم
ارجع غنّي
يا قلم
تَ نغنّي معك.
.. محمد عزو حرفوش..
تعليقات
إرسال تعليق