بتعرفي شو يعني بحبك بقلم الشاعر غدير سلام

بتعرفي شو يعني بحبّك ؟ 

.

بحبّك يعني أنتِ السّنا ..

لَروحي يا عمري و أنتِ الوتين ..

و بعدِك ما في منى ..

و لا هَنا ..

و أنتِ الأنا ..

و كل دَوّارة ياسَمين .

.

بحبّك يعني عيونِك عيوني ..

يا عيوني و لحافِك جفوني ..

و بتموني على رشدي و جنوني ..

و خدّك رغيفي ..

 و شفّاتِك رَوى أنيني و حنيني ..

 و نبض بَيّارات العمر و سَنا لسنين . 

.

بحبّك مَ فيّي عيوني فتّحها ..

إلّا على ضيا وجهِك يكحّلها ..

و يعمدها بتراتيل عيونِك ..

و جنونِك يصَحيها ..

و يفرحها ويعطّرها ..

و كل أيامي بندرها ..

لروحِك الحلوة الما في متلها ..

لنبضِك الماشي بدمّي ..

و اللّي بيماهي نبض أمّي ..

و  بيعيّشني بقلب عمري عمرين ..

و تخميين .. 

بكل لحظة بَدّو ..

بيطيّرني بلا جنحين .

.

بحبّك يعني أنتِ صلاتي ..

و النّهدة اللّي بتنعشني ..

و بتمرجحني ..

 و بتنوّرني و بتصوّرني ..

و بتِسْميني و بتشرّفني .. 

و أنتِ حياتي .. 

و لُغاتي و كل تعابيري ..

و كلماتي .. 

كل حروفي و هَمهَماتي ..

و مَحّاية بحياتي لكل العابرين .

.

بحبّك يعني الرب من عرشو أذنلِك ..

تكوني المَلَكِة و بيلبئلِك ..

تكوني كل أميرات الدّني ..

و يللي بقصص أيام الولدنه ..

و بيطلعلِك ..

 يا عمري بيكفّي تعرفي أدّيشني بكل لحظة بشتقلِك ..

و بندهلِك ..

 يالله تعي .. 

يالله تعي رتليلي بمسمعي ..

أحلى أغاني الحب و الحنين ..

يا شغف كل السنين ..

يا عمر ماشي بروحي و بكياني ..

و كل زماني ..

مملكتِك .. 

و كل ضَوعي من شفتِك ..

يا ست الحلوين .

.

.