تايهين بقلم الشاعر محمد عزو حرفوش
تايهين.. ( محكيّة ).
يا حسرة وألف يا حيف
قديش غيّرنا هالزمان
وصلت لَ عند الرغيف
طوابير الذل والإذعان
يا ريتها سحابة صيف
ترحل عنّا كيف ما كان.
ضاقت عيشة الشريف
ياعيب الشوم يا إنسان.
يا حسرة وألف يا حيف
قديش غيّرنا هالزمان.
عفيف النفس الحزين
تايه مقهور بِ كلّ مكان
لصوص تكدّس ملايين
خمر وعربده ونسوان
صاروا للظلم عناوين
عاطل صرت يا ميزان.
يا حسرة وألف يا حيف
قديش غيّرنا هالزمان.
ستنا البطاقة الذكية/ي
لجامها بِ كل ميدان
كلّ رسائلها عاطفية/ي
ما بتعرف اِلها عنوان
ضاعت الوحدة العربية/ي
وبطاقة وحّدت البنيان.
يا حسرة وألف يا حيف
قديش غيّرنا هالزمان.
تغيّرت طريقة التفكير
انحصرت بِ كم فرمان
بكرا شو رح بِ يصير
بْحال بالأصل خربان
وندعي ياربنا تجير
شعب من حالو طفران.
يا حسرة وألف يا حيف
قديش غيّرنا هالزمان.
فاجر يحكي بالفضيلة/ي
الصدق من كلامو هربان
تاريخ معبا بالرذيلة/ي
ما بتفرق معو ولا سألان
مابِ يدّخر أي وسيلة/ي
تَ يكسر بيضة القبّان.
يا حسرة وألف يا حيف
قديش غيّرنا هالزمان.
الكل فينا صار يتاجر
وكلمن بِ ميدانو فنان
نص الشعب عم يهاجر
والنص التاني غضبان
يا ظلم تركنا وغادر
بلكي بْ يرجع نيسان.
يا حسرة وألف يا حيف
قديش غيّرنا هالزمان.
.. محمد عزو حرفوش..
تعليقات
إرسال تعليق