وينك ياأمي بقلم الشاعر ايميل حمود
وينِك يا أمّي
دقّدقَ عا بابي العيد
يا أمّي
خفت بغيابِك باب
أفتحلو
يسأل وأشرحلو
وأستحي إنّي قول
صفا العمر ويلات
خسرت الدفا بضمات
وخسرت شو بدي
وما نلت شو ما بريد
دقّدق كتير كتير
عالباب ما رديت
حتى الشمع طفيت
عا غيابِك المحزون
شو مطّرت العيون
شاخ العمر وأنهد
حيط العطا والخير
وقلب اللي كان كبير
يساع الدّني بحالا
وآه الألي وتنهيد
دقّدق عا بابي وقال
وينا الحنونة الطيّبة
ست الوفا وتحنان
نبع العطا اللي كان
يسقي ورود البل فلا
حتى الحزن ما يتدبلا
وتموت ويشح العطر
وفينا اليباس يزيد
دقّدق يا أمّي وأستحى
منّي وحرف أسمِّك محى
يلي حفرتو بالوفا
وبطيب قلبِك والصفا
نوّر حياتي وصانها
وحافظ على عمري بسعد
وبعدِك شرد منو العهد
ضيّع وراقي وصورتِك
بقيت بقلبي معلقة
بحبّ وسعادة مطوقة
مهما جرى بتضلّ
شمعة تضوي عتمتي
وبرجع وبخلق عن جديد.
الى أمّي التي افتقدتها
بعيدها العظيم.
ايميل حمّود
تعليقات
إرسال تعليق