شروق وعتاب بقلم الشاعرة غروب شبيب
قصيدتي مهداة إلى شقيقات روحي ..
شروق ...عتاب شبيب
( شروق وعتاب )
من عتم هالليل عم يسرسب حكي
وعنين صوتو ع الصدى عم يشتكي
ينده طفولي من بعد الغياب
ضحكات ع خد الزمان مشربكي
هونيك عنونا المحبة ع البواب
وأحلام بحضن البراءة ملبكي
وهونيك مريول المدرسة والكتاب ..
يادروب بتلون فرحنا الليلكي
يوعى الصبح ع شروق غافي بالهداب
تعتق خمر شربان من شهدو الزكي
يعانق غروب غفيان ع كتف العتاب
ياسراج ضاوي وع المودي مرتكي
ياعتب لاتعتب ع غيم كذاب
جايي الشتي بغيمات حب محبكي
بعدون بعيوني والخيال ماغاب
حكاية ولدنه والوفا كل الحكي
وهاك العريشة وطلة الأعناب
عنقود خصلاتو سعادي مشكشكي
وحبال مرجوحة حزينة ع الغياب
وأشواق سكرت ع أنات البكي
بخور ذكرى والهوى غلاب
والعمر راكض سنه من بعد السنه
وين فلينا ع دروب صبحا ضباب
وهموم مكتوبة بأماني معنونه / ي
بتذكر زعلنا ع ألوان التياب
ومين فستانها الأحلى وخيوطو ملونه/ي
ومين بصفوفها أولى على الطلاب
ومين من كتبا فاحت عطور الولدنه/ي
ومن أيد أمي لفة الزعتر طياب
زيتا حنان وخبزها الحب الهني
ياريت ماكبرنا وهالفرح ماشاب
ولماتنا الحلوة ياقمار مزينه/ي
وروحي قسمتا بين شروقي والعتاب
نسمة ربيع معطره بالسوسنه/ي
..................................
غروب أحمد شبيب
تعليقات
إرسال تعليق