ارجعي(محكية) بقلم الشاعر محمد عزو حرفوش

ارجعي..( محكية )

تعي  نتذكر  أيام عشناها سوا

نسرح بالمروج يمرجحنا الهوى

شو كانت أشواقك الحارقة إلي

تشعل حنين قلب منك ما ارتوا.

جرح جوات  الروح بعادك عاملو 

ينزف متل شلال يمكن عام إلو

وطيفك متل الحلم صرت عاملو

عليل وعيونك لْ علتي الدوا.

كيف هيك عنّي قدرتي تبعدي

بميثاق العشق صرتي تجحدي 

شو بعد بدك من عمري خدي

عنقود حبي على شفافك استوا.

حبل ودّك بعدو هالقلب حافظو 

لو مرّه غفي نبضاتو بْ تيقظو

بين ضلوعي عَ العمر مْ مبروظو.

بغار عليك حتى من نسمة هوا.

ارجعي ومعاك كل الحلا رجّعي

ورود خدّك ما بِفتّح غير معي

بلا عناد وهالمرة منّي اسمعي

ضيعان كل لحظة ما نعيشا سوا.

.. محمد عزو حرفوش..