مابقا فيي خبي بقلم الشاعر محمد عزو حرفوش

محكيّة غنائيّة..

ما بقا  فيي خبّي

تعبت وتعب قلبي

يا ظلم عنّا روح

وارحمنا يا ربّي.

صار الظلم عنوان

مشرّع بكل مكان

شو تغيّر هالزمان 

صار العمر لعبه/ي.

سرقوا حلم الطفولة/ي

وعملوا القتل بطولة/ي

شو طوّلتْ هالجولة/ي

زاد القهر بالرتبة/ي.

وينو ضمير الناس

والصدق والإحساس 

حتّى العقل بالراس 

عايش كأنو بغربة/ي.

قالوا الزمن غدّار

والدنيا كلّا أسرار

لكن طمع الأشرار

هوي سبب هالكربه/ي.

غابوا عنّا الأحباب

وتفرقوا الأصحاب

وصار الأمل سراب

أو خايف ومتخبّي.

غابت صور الأخلاق

وتبعترت الوراق

يالله شو مشتاق

ترجع إلنا المحبة/ي.

يرجع شعاع النور

وتتفتّح هالزهور

والفجر يخط سطور

ع الله مانا صعبة/ي.

..محمد عزو حرفوش.