عطر الحياة محكيه بقلم الشاعر محمد عزو حرفوش

عطر الحياة.. محكيّة.

كان الفجر  عم يمسح جبينها

والبسمة كأنها خلقاني بعيونها

فاق العمر من غفوتو وشاف القهر

محفور بكل تفصيلي من سنينها.

ياما شفت ايديها المشققا  

خوابي التعب فيها معتقا 

تصارع تَالشمس ماتسبقا

وتنشّف الندي عن ساق قمحاتها.

كنت اسمعا تغني بصدق إحساس 

تدعي يارب اطعمنا لَنطعم الناس

ولما البيدر  يصير كداس كداس.

تنسى التعب وبالشكر تغرّد كلماتها.

من زمان سألتها بكل حنيه/ي

يا أمي شو بدك جبلك هديه/ي

بترخصلك هالكنوز الكونيّة/ي

ونطرت اسمع ردها وكلماتها.

ْرفعت راسها بهمه قويّه/ي

انتَ من الله هديتي يابنيي

بدّي تكون بخير وما تنحني.

ياأمي بس إلك بْفخر بنحني. 

بوّست ايدها وجبينها المرفوع

وصوت دعاها إلي للسما مسموع

آااخ ومية آخ يا زمن لو إلك رجوع

تَ اغفى لو مرة عَ راحاتها وخبرا

قديش كنت حبها وقديش بْقدّرا 

وإنها ما كانت إلي بس أم

هي القلب هي خلايا الدم

وهي بعيوني العيش الهني.

ومن بعدها مافي أم ولا في دني.

..أطال الله في أعمار الأمهات ورحم منهنّ الأموات. 

.. محمد عزو حرفوش.