شاعر بلا كلمات بقلم الشاعر محمد عزو حرفوش

محكيّة..

شاعر بلا كلمات..

قالت يا شاعر أوصفني بعشر أبيات

اقراها ع مسمعي بلهجتك العتيده/ي

خليني اسرح بخيالي مع الغيمات 

مع كلّ بيت يعلا نبض وريدي

حتّى لو شفتني محلّقة مع النجمات

لا تصحّيني ياريت امسكني بأيدي 

خلّيك يا شاعر عم تراقب النبضات

ضمني عَ صدرك لو شفتني عنيده/ي 

رح  اعذرك  واتهم  هاك  النسمات

إنّها رمتني بحضنك بلحظة سعيده/ي

عم تحاكيني وتمطرني بالغمزات

من عيون فاتنه/ي بسحرها الوحيده/ي

وشفاف معتّقة بتشتهيها السكرات 

تحلف مية يمين إنها للعشق مفيده/ي

نسيت الشعر ونسيت كلّ المفردات

صارت نبضات قلبي حروف القصيده/ي

دابت أقلامي وسكرتْ الصفحات

غاب الحكي بينّا لحظات مديده/ي

تاري لشيطان الشعر عطر كلمات

حاضرة بكل لحظة وصف رشيده/ي

ما عرفتْ الشاعر بهاك اللحظات

كنّي  أنا  ولّا  أنوثتها  الفريده/ي.

.. محمد عزو حرفوش.