صدفه بقلم الشاعر محمد عزو حرفوش

صدْفه.. ( محكي )

مسكتْ بايدي وقالت مشّي معي

مشوار  نقضيه  وحدنا بْلا وعي

قلتْلا   يا بنت  شيّبني هالزمان

رجعيلي  شبابي  وبعدا ارجعي.

قالت  وحياتك  أنا  اللي برجّعو 

بحسني ودلالي الشباب بصنّعو 

مع إني معجبة بشيبك ما أروعو 

رح رجِعك شيخ الشباب الألمعي.

صدقتها أو يمكن أنا هيك بدّي

من زمن نايم لوحدي عَ المخدّي

شي تخيّلتْ إنو خدّها عْلى خدّي

نيران ولعت وليها جديت السعي.

شهقتْ  وقالت  يا عاشق تروّا

مش هيك لازم تبتدي مع حوّا

بدّك تخبر عطرها وتختبر جوّا

جوّي أنا كلام الغزل عَ مسمعي.

بحياة ربّك قولي غير هالحكي

كرمال قصيدي كلّ هيك ملبكي

مش عارف بفرح أو منّك بشتكي 

هيك يا بنت فرقت الحسبة معي.

قولتك شو بقا بْينفعنا هالجدل 

طالما محرّم علينا دوق العسل 

لو آدم وحوا هيك قضّوها غزل

ما كنت شفتك ولا فيّ بتسمعي.

.. محمد عزو حرفوش.