خبرية (محكية) بقلم الشاعر محمد عزو حرفوش

خبرية.. ( محكيّة )

ارجعي تَخبْرك بغيبْتك شو صار 

طالت ليالينا وصار العتم أشجار

يمكن ما يعجب الورق لْ بكتبو 

كسّروا الأقلام  تَ جفّتْ الأحبار.

بغيبْتك  هالدنيا  شو  تغيّرت

غاب العطر والقلوب تمرمرت

كل الوحوش عن أنيابا  كشّرت

والطياب متل قشّه بوجه إعصار.

زاد الغدر غاب الوفا بين الناس 

صاروا دُمى أشكال بلا إحساس 

هات المطرقه افتحلك كم راس 

شوف أمخاخ مفرّغة من الأفكار.

راعي الشوارب آكل حقوق أختو 

يحكي بالفضيلة وبيخون  مرتو

أقوالو شو منمّقة وكل ما سمعتو

بتحلف مية يمين إنو من الأخيار.

أجيال طالعا عايشه على عماها 

كابوس البروزة والتقليد  عماها 

سلّم الأمر  لَ الله وادعِ  عساها

تهتدي وتصحا من غفلتا شي نهار.

هيك صار فينا بِ غيبة الأخلاق

تْسيّد الباطل واختلطت الأوراق

حتّى اللي كانوا بالأمس عشّاق 

تْبخّر  عشقهم  من أوّل اختبار.

يا دنيا بحلّفك حاجي ظلم وقهر

أطفال شابت قلوبها قبل الشعر

شباب ضاعت ومنها ضاع العمر

خبرينا بعد شو عندك باختصار.

.. محمد عزو حرفوش.