محكية أنين قلم بقلم الشاعر محمد عزو حرفوش
محكيّة..
أنين قلم..
خبّرني يا قلم
شو صاير معك؟
زايد أنينك
شو اللي موجّعك؟
ياما سحرت بشفافك سطور
من زيت حروفك
ياما سطع نور
تنسج أمل
ترسم فرح وزهور
ياما كنت تسمعني
وياما كنت اسمعك.
مابعرفك يا قلم
من قول الحقّ بتستحي
ولا خانك بيوم عطر الوحي
الفجر من شفافك
ياما صحي
يعانقك فرحان
والليل يودّعك.
حاسس إنّك
من الشمس خجلان
من وجع الشعوب
من سرقة الأوطان
راح الملح والحبر
بين البشر ضيعان
حقّك يا قلم
تكون مقهور وعتبان
كتر الأيادي
شو عملت معك.
خبرني يا قلم
عن حكايا العشاق
عن سحر التلاقي
ووجع الفراق
والوفا والصدق
والبخور والحبق
عن كلشي هيّج مدمعك.
غيمات بالسما تكدّرت
وماتت عطش.
وهدب الزمان
تكبّر.. تغيير.. ما رمش
حتّى القمر بِغربته/و..
كتير اندهش
لملم حكايته/و..
وخباها معك.
لا تعتزل أرجوك يا قلم
بعدك مافي تاريخ ينكتب
ولا حروف للأمل تنسكب
مافي قانون مافي قيم
ارجع غنّي يا قلم
تَ نغنّي معك.
.. محمد عزو حرفوش.
تعليقات
إرسال تعليق