ذكريات أم شهيد بقلم الشاعر محمد عزو حرفوش
ذكريات أم شهيد..
صباحكْ خير يا إمي
يا وجع روحي
يا صور عم تمشي بدمي.
يا أوّل فرحتي
يا نبض عمري
لو تعرف شو بتذكرك وشو بحبّك.
بتذكرك لمّا خلقت
لمّا كبرت لما مشيت
لمّا جعت لمّا مرضت
لمّا شفيت لمّا حبيت
لمّا رقصت ولمّا غنيت.
ايييه والله ياإمي بتذكرك.
بتذكرك واقف ع الباب
بتذكرك فاتح كتاب
بتذكرك مسجّى بالنعش
ع كتاف الأحباب.
بتذكرك مالي عليّ البيت
صرت صورة معلّقة ع الحيط.
بشوفك كل يوم نازل من الصورة
تبتسم لمّا تشوفني مقهورة
تبوّس ايدي
تمسح دمعتي
تهمس لروحي
ارفعي راسك يا إمي
وافرحي من جديد
كنت ع الأرض بطل
وصرت بالجنّة شهيد.
بخاطرك يا إمي
يا محتسبة يا صبوره.
تبوّس جبيني وترجع ع الصورة.
الله معك يا إمي الله معك.
كل يوم رح صلّي وادعيلك
واحضن الصورة لآخر العمر وغنيلك
وكل ما شميت البخور والعطر
وهلّت بشاير النصر اتذكرك.
الله معك.. الله معك يا خالد عند ربّك.
رح ابقى يا عمري اتذكرك.. واتذكرك.
آآآآآخ يا بنيي
ليش أنا نسيتك حتّى اتذكرك؟!.
.. محمد عزو حرفوش.
تعليقات
إرسال تعليق