نبض الوطن بقلم الشاعر محمد عزو حرفوش
محكية غنائية
نبض الوطن.
إلك الله يا وطن
عمل ايه فيك الزمن
ولا ولادك خانوك
وزادوا فيك الفتن.
وسنين فيها العجب
على مين يبقى العتب
شو قصّروا لْ وصفوك
بتشبه جنة عدن.
وآهين يا وطن
يا معوّد ع المحن
يا ويل الِ ظلموك
بالسر وبالعلن.
سرقوا حتى الحلم
ملّوا الدنيا ظلم
سافروا ونسيوك
تركوا فيك الشجن.
نسيوا الزمن دولاب
وحب الوطن غلّاب
رح نرفع الأعتاب
وقلوب إلك سكن.
شو تغرّبت القلوب
والعاصي ما بيتوب
بدها صبر أيوب
تَ يحمل هالبدن.
دنّسوا طهرك لْغراب
ما عملوا أي حساب
وتفرقوا الأحباب
الغربة صارت كفن.
ياريت الماضي يعود
حب ووفا وعهود
بكّي الوتر يا عود
غنّي لحن الوطن.
.. محمد عزو حرفوش.
تعليقات
إرسال تعليق