قاعد لحالي بقلم الشاعر هيثم عبد الهادي
قاعد لحالي وعالهدا طيفك مرق
دقدق عبابي وصحى عندي الوعي
فتحت عيني تشوف شو يلي انسرق
لقيت حالي بمطرحو بعدو معي
*****
بس الفكر كان هوي اللي اشتلق
ع صوت طرطق بالهمس ع مسمعي
تحرك لساني و ع الفور دغري نطق
وحدي انا .. وانت بخيالك يلا تعي
*****
قاعد لحالي انا وهالكاس العرق
بعدي مابين وبين عم جد السعي
انت الحقيقة اللي متل شفة عرق
تسري بعروقي ت تسكن مدمعي
*****
وحتى م سري ع البلية ينفتق
ويظهر ابو النواس هالجالس معي
بخلي الجرح بالقلب وحدة ينرتق
جوا قلب العناية الفائقة ب اضلعي
*****
وبكتب عبابي لايحة بجود الورق
هون الحقيقة يلي عليها مرجعي
وبسكب ع حالي خمر لو اح مرق
تيقول هاد خطي مو بحالة وعي
تعليقات
إرسال تعليق