صدفه محكي بقلم الشاعر محمد عزو حرفوش

صدْفه.. ( محكي )

مسكتْ بايدي قالت مشّي معي

مشوار نعيشو وحدنا بْلا وعي

قلتْلا  يا بنت  شيّبني هالزمان

رجعيلي شبابي وبعدها ارجعي.

قالت وحياتك أنا اللي برجّعو 

بحسني ودلالي الشباب بصنّعو 

ولو إني بحب هالشيب ماأروعو 

رح رجِعك شيخ الشباب الألمعي.

صدقتها أو يمكن  هيك بدّي

هالحكي تعملو ويصير جدّي 

تخيّلتْ لحظه خدّها عَ خدّي

نيران ولعت وجديت السعي.

شهقتْ وقالت ياعاشق تروّا

مش هيك بتبتدي مع حوّا

بْتخبر عطرها وتختبر جوّا

أنا بعشق الغزل عَ مسمعي.

يا بنت قولي غير هالحكي

قصيدي وكلّ هيك ملبكي

شو برضا أو منّك بشتكي؟ 

هيك فرقت الحسبة معي.

قولتك شو بينفعنا الجدل 

إذا حْرمتينا ندوق العسل 

لو آدم وحوا مضوها غزل

ما شفتك ولا فيّ بتسمعي.

.. محمد عزو حرفوش.